AUNG SAN RU SAI NI A MYIT JASAT

Bogyoke Aung San ngu ai wa gaw, nhtoi 29-11-1946 ya shani Myitkyina de du lung wa nna Jinghpaw du salang marai (30) a man e shawng nnan tsun hpang ai ga gaw:- "Daini ngai du sa ai lam gaw, Myen mung kata na amyu sha ni yawng myit hkrum kahkyin gumdin lam lu la na matu re. Inglik mungmaden ni anhte hpe nau dip sha wa ai majaw, Japan hte pawng nna gasat kau sai. Japan ni  mung shanglawt jaw na nga nna n jaw ai majaw, Inglik hte bai pawng nna Japan hpe gasat kau sai. Ya mungkan majan ngut ai hpang Inglik ni anhte hpe matut up sha na hkyen wa ai majaw, shanglawt lu hkra jawm shakut ga, ngu mayu ai lam re," nga nna tsun shaga lai wa sai lam na chye lu ai.

Gaja wa nga yang, Jinghpaw Wunpawng sha ni a ntsa mungmaden ai gaw, Inglik n re sha Aung San wa she rai nga ai. Moi chyaloi prat kaw nna anhte amyu hpe kadai n up sha yu ai. Inglik prat hta Jinghpaw bumga hpe kadai Myen wa n sa up ai. Inglik ni pyi Jinghpaw Gumchying Gumsa Du ni hpe she Jinghpaw htung lai hku raw up shangun lai wa sai. Inglik wa kaw Myen hte shanglawt pawng la ai shani kaw nna, jiwoi hkringhtawng Jinghpaw buga mungdan gaw, Myen wa a lata de shang mat ai hkrum saga ai.

Indonesia zunjaw kata na Brunei mungdan kasha gaw, Jinghpaw mung Myitkyina sinpraw hkran na Waingmaw pa daram sha re ai mungdan rai nga ai.  Wan sau nhprang hte dat nsa (gas) grai pru ai ginra rai nga ai. Hpaga yumga htuk manu ai hta hkan nna, shawng de panglai damya ni zingri sha lai wa sai rai tim, dai panglai damya ni hpe manga ning laman Inglik ni atsai gasat shamyit kau nhtawm, 1888 kaw nna Inglik ni yu mada makawp maga ai kata e shim lum ai hku rawt galu kaba wa sai. Malay amyu ni nga ai ginra rai nna, Mungkan Majan hkoi ai hpang e, Malaysia a daw chyen hku nga lai wa sai raitim, 1-1-1984 ya shani laksan awmdawm mungdan byin tai wa sai hte, lu su dik ai mungdan langai hku mungkan hta dan dawng taw nga sai. Jinghpaw Wunpawng sha ni hku nna lamu masawp n dep rai mat masai.

Lai sai (24) ning laman hta Aung San Kaw gaw, Myen mung kata na rudi mungchying sha (Ethnics minorities) ni a lam hpe ningshawng tawn nhtawm mungdan simsa ngwipyaw wa na lam galaw ra sai nga nna hkrai aja awa tsun shaga lai wa sai. Lai sai nhtoi 24-2-2012 ya shani Myitkyina-Shatapru Manau Wang e Aung San Kaw mungmasa tara hkaw ai hta, "Moi ndai Myitkyina e nye kawa Aung San tsun lai wa sai hte maren, Jinghpaw lap mi, Myen lap mi nga ai gaw hkrak teng ai lam re. Daini Jinghpaw ni a majaw she Munghpawm Mungdan byin tai wa sai re. Myen amyu mung rudi mungchying sha (Tai-yin-tar) sha re. Lahkawng lang ngu na Panglong zuphpawng galaw ra saga ai. Mungchying sha a lam she ahkyak madung re. Mungmasa ladat hte jawm hparan la ra sai," nga nna hkaw tsun kau da sai lam na chye lu ai.

Raitim Thein Sein hte shan lahkawng hkrai dum dum hte hte hkrum bawngban lu ai hpang gaw, lahta na ga si ni n tsun mat sai. "Amyu sha ni shada bai hkau chyap lam - National reconciliation" ngu ai ga hte "Tara Upadi shingkang ka-up lam- Upadi tsu muh ye" ngu ai hpe sha tsun shaga mat sanu ai. De a lachyum gaw, Myit bra nga ai Myen amyu ni bai hkau chyap rap ra nhtawm, amyu kaji ni a ntsa amyu kaba lailen hte dip gamyet sha na, ngu ai masa rai nga malu ai. Shawng daw de tsun ai "Tai-yin-tar" ngu ai ga n tsun mat sai. Lam mi hku nna rim rawng da hkrum ai shi a NLD masha ni hpe n lawt lawt hkra, tsun dara shapraw la lu sai raitim, anhte Jinghpaw, Sam, Kayin, Kaya ni, tinang amyu sha lam yan a ninghkan rim hkrum ai ni lawt lu hkra ga hkaw mi mung n tsun shaga mat sai.

Dai re majaw Thein Sein hte Aung San Kaw yan lagu hkrum hkrum re ai gamung gaw, Myen amyu ni shawng shada myit hkrum kahkyin gumdin na. Dai hpang amyu kaji ni hpe yi ngam sharawt nna hpya sha mat wa na lam san san rai nga ai hpe mu chye kau ya saga ai. Aung San Kaw mung kawa a kasha re. Shi kawa anhte hpe masu hkalem kau ai zawn, shi mung hkalem na chyalu sha re. Mungkan ting gaw democracy hpe ra sharawng ai. Democracy kaja ai hpe yawng chye ai. Rai tim annau ni a matu ahkyak madung gaw, awmdawm ahkaw ahkang lu ai kata na democracy she rai ra mali ai. Tinang gam maka tinang dawdan lu ai (Self determination) baw democracy she rai ra mali ai. Myen wa a masu hkalem ai kata na democracy hpe kam ga yang, shawng de shaning (60) jan mayam tai hkrum ai hta, matut nna shaning tsa, shaning hkying matut yam sha katut na ga ai. Hpa mi nga nga Aung San Kaw mung Myen gaw Myen sha re. Masu hkalem sha ai baw hta ram dik ai puhtum amyu Myen num nan rai nga ai hpe dum sadi koi yen kau saga law.

Hpaumya Bawk

11/9/2012

Far-east Coast, Russia.(by:jinghpawkasa)